YTI-ALFALAH.ID Peringatan Maulid itu boleh pake cara ape aje. Mau ngaji, marhaban, ngadain santunan, asyik aje. Asal tujuannya satu: biar kite tambah sayang ama Rasulullah, ngikutin akhlaknya Beliau, dan ketakwaan kite ke Allah makin kuat.

Ye kan?

Nah ini die, SDI Al-Falah III yang ade di Pos Pengumben Kebon Jeruk Jakarta Barat, ngadain peringatan Maulid pake tema 'Betawi Punya Gaya' Kamis, 27 Agustus 2026 di Auditorium Pondok Pesantren Al-Falah, Sukabumi Selatan Kebon Jeruk Jakarta Barat. Dari mulai MC-nye, sambutan kepala sekolahnye, sambutan penceramahnye, sampe penampilan murid-muridnye, semue kental banget bahasa Betawinye.

Bukan cuma itu aje, panggungnye juga Betawi banget. Ade rumah Kebaya Betawi, Ondel-ondel, sepeda ontel, sampe ornamen-ornamen Betawi komplit dah. Pokoknye begitu ngeliat ke panggung, kite langsung keinget ama Bang Doel, Babe Sabeni, Mak Nyak.

"Ahlan wasahlan kite ucapin di acara peringatan Maulid ini. Kite ucapin banyak-banyak terima kasih buat para hadirin yang udah sudi mampir dimari," begitu kata MC pas ngebuka acara.

Terus dilanjut ama Baba H. Rahmat Maroni, M.Pd.I, Kepala Sekolah SDI Al-Falah III yang nyambut tamu dengan ramah. "Saya ngucapin terima kasih banyak kepada baba, nyak, mpok yang udah hadir di mari," sambut Baba Rahmat. Menurut Beliau, peringatan Maulid di SDI Al-Falah III emang dari dulu udah pake tema-tema. "Kemaren-kemaren ade tema Aceh, Padang, Baduy, nah sekarang giliran tema Betawi," jelas Baba Rahmat.

Ketua Yayasan Tarbiyah Islamiyah Al-Falah (YTIA), Baba H. Ahmad Farid, RS., juga ngasih sambutan. “Dengan kite memperingati Maulid, kite meneladani akhlaknya Rasulullah. Kite girang karena diutusnya Nabi Muhammad buat umat manusia, dan kite wajib banget bersyukur,” tegas Baba Farid. Terus Baba Farid juga nyeritain tentang burung Ababil yang ngehancurin pasukan bergajahnye Abrahah yang mau ngebunuh Rasulullah. “Tu burung Ababil nimpuk gajahnye pake batu panas dari neraka!”

Setelah penampilan Talaran Nasab Nabi dari murid-murid sekolah, Nyak Hj. Roziah, M.Pd., dari Mapenda Kebon Jeruk ngasih pesen di sambutannye. Salah satunye tentang pentingnye jujur. “Nah anak-anak, pas ulangan jujur kagak? Pas dikasih duit SPP jujur kagak, kagak dijajanin? Suka bohong kagak?” tanya Nyak Roziah ke anak-anak. Dengan kompak anak-anak jawab, “Kagak!”

Abis acara santunan yatim, pengumuman juara lomba Maulid, pidato anak, story telling, sampe tarian Betawi, akhirnya yang ditunggu-tunggu dateng juga. Baba KH. Syahroni naik ke panggung. Beliau ngasih tausiah buat para hadirin yang dateng Maulid, khususnye ke anak-anak.

Di atas panggung, Baba Syahroni ngetes anak-anak pake macem-macem pertanyaan; sapa aje saudarenye Rasul, nyebutin nama 25 Nabi, nyambungin ayat, sampe ngapal sholawat. “Wah... keren pisan!” kata Baba Syahroni pas ade anak yang naik ke panggung bisa nyambungin ayat dengan bener, suarenye juga mirip Qori. “Nih duit buat kamu!” ucap Baba Syahroni sambil ngasih duit 50 ribu.

Dari beberapa pesen yang disampein Baba Syahroni, Beliau nekanin kalo kite musti hormat ke orangtua. “Kalo salim ke orangtua jangan naruh tangannye di jidat, itu mah bukan salim!” kata Baba Syahroni. “Cium tangannye, bolak-balik, punggung tangan ame telapak tangannye.” Rasulullah, kata Baba Syahroni, sangat ngemuliakain bukan cuma orangtuanye aje, tapi juga orang-orang yang lebih tua dari Beliau.